Dál lea ON: a álgoálbmotgielaid jahki – sámegiel videologaldat dálkkádatrievdamis ja sápmelaččain

Ovttastuvvan našuvnnat lea julggaštan jagi 2019 álgoálbmotgielaid jahkin. Ulbmilin lea čalmmustahttit álgoálbmotgielaid mávssolašvuođa oba máilmmi kultuvrralaš riggodahkii. Álgoálbmotgielaid jagi koordinere UNESCO. Akademalaš searvvuš oassálastá álgoálbmotgielaid jahkái nu ahte juohká álgoálbmotgielaide dollojuvvon logaldagaid máilmmiviidosaččat. Ovttasbarggu koordinere Translation commons -searvvuš.

Birasdearvvašvuođa ja geahpesdávddaid dutkanguovddáža (CERH) dutkidoavttir Juvvá Lemet, Klemetti Näkkäläjärvi, doallá videologaldaga davvisámegillii fáttás sápmelaččaid vuogáiduvvan dálkkádatrievdamii. Logaldat dekstejuvvo eŋgelasgillii. Logaldaga mielčuovvu materiála lea oažžunsajis davvisáme- ja eŋgelasgillii dáhpáhusa siidduin. Näkkäläjärvi bargá SAAMI-fidnus, mii dutká sápmelaččaid vuogáiduvvama dálkkádatrievdamii.

“Mii dutkat dálkkádatrievdama holisttalaš váikkuhusaid sápmelaččaide ja hálidit leat mielde ávvudeame sámegiela ja eará álgoálbmotgielaid”, muitala CERH:a hoavda, professor Jouni Jaakkola. “Váikkuhusaid lassin, mat čuhcet dearvvašvuhtii ja buresbirgejupmái, dálkkádatrievdama bistevaš váikkuhusat uhkidit sámiid giela ja kultuvrra. Klemetti Näkkäläjärvi sámegiel logaldat dálkkádatrievdama váikkuhusain sápmelaččaide lea dehálaš guovtti áigeguovdilis oaidninvuogis, dat sihke nanne sámegiela anu ja gidde fuomášumi dálkkádatrievdama kultuvrralaš váikkuhusaide”, Jaakkola joatká.

CERH:is leat johttáhuvvon guokte dutkanfidnu, mat gieđahallet sápmelaččaid, ja main lea diehtu davvisámegillii CERH:a neahttasiidduin. Logaldat boahtá Oulu universiteahta birasdearvvašvuođa oahpporáiddu oassin ja CERH joatká barggus álgoálbmotgielaid ovddideami várás akademalaš máilmmis maid mearkajagi maŋŋel. CERH lea dálá dieđuid mielde áidna álgoálbmotgielaid jagi suopmelaš akademalaš partner, mii doallá logaldaga álgoálbmotgillii.

“Giella lea kultuvrra muitu ja dat seailu ja ovdána dušše hupmamiin. Sámegielain lea hui rikkes terminologiija, mii gullá luonddu áiccadeapmái, muhto dat lea vára vuolde asehuvvat ealáhusaid ja luonddubirrasa earáhuvvama mielde. Lea mávssolaš, ahte álgoálbmotgielat ovddiduvvojit ja čalmmustahttojit akademalaš giellan bissovaččat”, Näkkäläjärvi deattuha.

Logaldat lea oažžunsajis 31.10.2019 rájes mielčuovvu liŋkkas: 

Effects of Climate Change to Saami People, Part 1
https://youtu.be/LP-1BOsQmqA

Effects of Climate Change to Saami People, Part 2
https://youtu.be/t2IGEp-5LqE

Lassidiehtu (SAAMI prošeaktagovvádus anáraš, nuortalaš- ja davvisámegillii): https://www.oulu.fi/cerh/saami

Sáhtát čuovvut akademalaš servoša oassálastima álgoálbmotgielaid jahkái sosiála medias: hashtags #Indigenouslanguages #WeAreIndigenous #IYIL2019 #Universities4IYIL.

Lassidiehtu:
Dutkidoavttir Juvvá Lemet, Klemetti Näkkäläjärvi
Birasdearvvašvuođa ja geahpesdávddaid dutkanguovddáš (CERH), Oulu universiteahtta
klemetti.nakkalajarvi(at)oulu.fi, tel. + 358 46 96206370

Last updated: 1.11.2019