Sámi muitaleddjiid jietnabáttit ja ođđa oahppamateriálat neahtas

Tiedote suomeksi (Dieđáhus suomagillii)

Oulu universitehta Giellagas-insituhta Sámi kulturarkiiva lea čoaggán nehttii boares sámegiel jietnabáttiid, mat leat dárkkuhuvvon namalassii sámegiel oahpahussii. Báttiid ja daidda laktáseaddji oahppamateriálaid bokte Sámi kulturarkiiva háliida buktit sámiid árbedieđu arkiivvas skuvllaide. Ulbmilin lea maiddái ovddidit sámiin čoggon dutkandieđu máhcaheami ruovttoluotta sámeservodahkii. 

Báttit leat čuhppojuvvon davvisamegiel, nuortalašgiel ja anárašgiel jearahallamiin, mat leat báddejuvvon jagiin 19391975. Dalle álbmotárbbi dutkit dahke viiddis čoagginmátkkiid miehtá Sámi. Ulbmilin lei vurket sámiid árbedieđu nu olu go vejolaš, ja barggu boađusin riegádedjege duháhiid mielde váldoáššis sámegielat jearahallamat. 

Dán jietnabádde- ja oahppamateriálačoakkáldagas leat jietnabáttiid lassin maiddái daid vuođul dahkon litteráhttat, nu ahte juohke muitalus lea čoakkáldagas maiddái čálalaš hámis. Litteráhttaid lassin čoakkáldagas leat oanehis suomagiel govvádusat báttiid sisdoalus, sátnelisttut ja hárjehusat, maiguin oahpaheaddjit sáhttet geavahit jietnabáttiid iežaset oahpahusas. 

Muitaleddjiid fáttát leat hui iešguđetlágánat. Čoakkáldat sisttisdoallá earret eará hávskkes muitalusaid sámiid árgabeaivvis, govvadusaid árbevirolaš ealáhusain ja sámi máidnasiid, main fearánastet gufihttarat ja stálut. Muitaleaddjit muitaladdet maiddái buorideamis ja luonddus, ovdamearka dihte dálkki einnosteamis.  

Jietnabádde- ja oahppamateriálačoakkáldat lea digitála hámis Giellagas-instituhta neahttasiidduin čujuhusas www.oulu.fi/giellagas/ajo 

Materiálat leat neahtas dovddaldagaid duohkin. Dovddaldagaid mieđihuvvo sámi oahpaheddjiide ja earáide, geain leat buorit ákkastallamat beassat geavahit materiálaid (omd. muitaleddjiid fuolkkit, dutkit ja sámesearvvit). Dovddaldagaid sáhttá diŋgot Sámi kulturarkiivvas čujuhusas ska(at)oulu.fi. Materiálat leat dárkkuhuvvon oahpahussii ja priváhtageavaheapmái, iige daid oaččo almmustahttit mange láhkai dahje juohkit sosiála media kanálain.  

Prošeakta lea čađahuvvon Suoma Kulturruhtarádjosa, Suoma Sámedikki ja Oulu universitehta Giellagas-instituhta doarjagiin. Čoakkáldaga jietnabáttit leat skáhppojuvvon Suoma arkiivvain; earret eará Suoma Girjjálašvuođa Searvvi ja Ruovttoeatnan gielaid guovddáža arkiivvain.   

Last updated: 29.5.2019