Sámegiela ávnnasoahpaheaddjiid skuvlejupmi

Studeanttat, geat ohcet ávnnasoahpaheaddjiid skuvlejupmái, čađahit bákkolaš oalgeávnnasin girjjálašvuođa heivehallon vuođđooahpuid (26 oč), sámiid kultuvrra vuođđooahpuid (25 oč), hállankommunikašuvnna oahpuid (5 oč) ja heivehallon ávnnasoahpaheaddji pedagogalaš oahpuid (60 oč).

Studeanttat, geat lohket eatnigiela ja girjjálašvuođa oahpaheaddjin, čađahit heivehuvvon ávnnasoahpaheaddji pedagogalaš oahpuid (60 oč) (= auskulteren). Oassi oahpaheaddji pedagogalaš oahpuin gullet kandidáhtadutkosii ja oassi magisttardutkosii.Kandidáhtadutkosii gullet 25 oč ja magisttardutkosii loahppa 35 oč ja ná oahput čađahuvvojit guovtti lohkanjagi áigge. Kandidáhtadutkosii gullevaš vuođđooahpuid galgá lohkat goalmmát lohkanjagi áigge ja magisttardutkosii gullevaš ávnnasoahpuid dalán dan maŋŋá studeantta njealját lohkanjagi áigge. Studeanttat, geat leat álggahan universitehtas ovdal jagi 2005, sáhttet čađahit oahpaheaddji pedagogalaš oahpuid ovtta jagis. Eaktun oahpaheaddji virggi oažžumii lea álo magisttardutkkus ja gáibiduvvon oahput ávdnasis dahje ávdnasiin, maid áigu oahpahit.

Sámegiela studeanttat čađahit oahpaheaddji pedagogalaš oahpuid (auskulterejit) sierranas oahpahushárjehallin. Studeanttat ráhkadit persovnnalaš oahppoplánaid (HOPSiid) ovttas šaddadandiehtaga lágádusa ja Giellagas-instituhta lektoriiguin. Ávnnasoahpaheaddjiid skuvlejumi teorehtalaš oahput čađahuvvojit Oulus, gos fas ieš praktihkalaš oahpahushárjehallan, mii dáhpáhuvvá skuvllas, čađahuvvo davvin.

Válljen oahpaheaddji pedagogalaš oahpuide dahkko heivvolašvuođaiskosa ja oahppomenestumi vuođul. Heivvolašvuođaiskosii sáhttá oassálastit guktii golmma vuosttas jagi áigge. Iskkus ordnejuvvo oktii giđđalohkanbajis ja oktii čakčalohkanbajis. Vuosttas jagi studeanttaid ávžžuhit oassálastit iskosii vuosttas geardde giđa bealde. Heivvolašvuođaiskosis sáhttá oažžut eanemustá 15 čuoggá ja vuolimus dohkálaš čuokkismearri lea guhtta. Oahppomenestupmi rehkenastojuvvo geardumiin golmmain oaiveávdnasa vuođđooahpuid gaskaárvu. Mearrádus oahpuide válljemis dahkko nuppi jagi čakčalohkanbaji áigge ja studentii almmuhuvvo, man jagi son galgá čađahit oahpaheaddji pedagogalaš oahpuid. Studeanttat, geat leat álggahan universitehtas ovdal jagi 2005, ohcet auskulteret giđa ohcamiid áigge. Oahpaheaddjiskuvlejumi álggahanbáikkit leat sámegielas guhtta.

Oahpaheaddji pedagogalaš oahput čoggojit šaddadandiehtaga vuođđooahpuin (26 oč), ávnnasdidaktihka oahpuin (12 oč), oahpahushárjehallamis (19 oč) ja váljaoahpuin (3 oč). Šaddadandiehtaga vuođđooahpuid sáhttá, jos nu háliida, čađahit maid ovdal auskulterenjagiid Davvi -Nuortabađaeatnama geasseuniversitehtas. Goluin studeanta vástida ieš, muhto Giellagas-instituhta studeanttat ožžot geasseuniversitehtas vuoládusa.

Šaddadandiehtaga vuođđooahpuin ja ávnnasdidaktihka oahpuin vástida Oulu universitehta šaddandiehtaga lágádus (oahppoáššiidčálli (08) 553 3682, KTK 261). Oahpahushárjehallamis, mii dáhpáhuvvá davvin, vástida Giellagas-instituhtta.

Sámegiela ávnnasoahpaheaddjiid skuvlejumi vástuolmmožin doibmet sámegiela lektorat, geain sáhttá jearrat lassedieđuid dárbbu mielde.