Oahpahus Giellagas-instituhtas

Giellagas-instituhta váldodoaibman lea oahpahus oahppoávdnasiin sámegiella ja sámiid kultuvra, maidda jagi 2004 válljejuvvojedje vuosttaš sierra váldoávnnasoahppit. Instituhta ulbmilin lea, ahte sii geain lea beroštupmi earenoamážit sámegillii, besset vuodjut namalassii giellaáššiide, ja nuppi dáfus fas dakkárat geain leat eanas kultuvrralaš beroštumit, sáhttet čiekŋut sámiid kultuvrii juo oahpuid álggu rájes.

Kulturoahpuide gullet muhtin veardde maid sámegiela oahput ja sámiid kultuvra lea diehttelas earenoamáš lunddolaš oalgeávnnas giellaohppiide. Ná dát guokte oahppoávdnasa maid dorjot nubbi nuppi.

Giellagas-instituhtta oahpahussii lea dehálaš, ahte oahpaheaddjiin ja oahppiin leat buorit oktavuođat eará ásahusaide, maiguin ovttasráđiid lea vejolaš fállat hui máŋggabealat giela ja kultuvrra oahpahusa sámiid birra. Mearkkašahtti oktasašbargoguoimmit leat earret eará Sámi oahpahusguovddáš Anáris, Sámi allaskuvla Guovdageainnus, Lappi universitehta (ee. Árktalaš guovddáš) Roavvenjárggas ja Rabas universitehta Oulu universitehtas.