Oahpuid rávven ja HOPS

Giellagas-instituhta buot bargit rávvejit ja bagadit oahpuid čađaheames ja plánemis. Kurssa vástuoahpaheaddji lea lunddolaččat dan kurssa buoremus bagadeaddji. Áššiin, mat laktásit oahpporegisterii ja tenttiide almmuheapmái, diehtá buoremusat amanuensa. Amanuensa rávve buot studeanttaid gažaldagain, mat laktásit dutkosa čađaheapmái, oalgeávnnasválljejumiide ja oahpuid ovdáneapmái. Son rávve oahppiid maid riikkaidgaskasaš lonohallama ja bargohárjehallama áššiin. Amanuensa lea deaivamis bargolanjas HU 327, telefonnummiris (08) 553 3486.

Oaiveávdnasiin bagadallama addet oahppoávdnasiid professorat ja lektorat. Sii leat veahkkin ee. persovnnalaš oahppoplána ráhkadeamis ja gažaldagain, mat laktásit jeavddalaš studeremii ja kurssaid čađaheapmái.

Sámegiela ávnnasoahpaheaddjiidskuvlejumi vástuolmmožin doibmet sámegiela lektorat ja sudnos sáhttá jearrat veahki ja lassedieđuid dárbbu mielde.

Oahppi galgá ieš plánet iežas studerema, oahpuid ovdáneami ja áiggi geavaheami. Dan várás galgá ohcat dieđuid ja dahkat válljejumiid. Oahppi galgá fuolahit, ahte sutnje čoggojit oahppočuoggát 60 oč /jahki. Oahpuid váldodeaddu lea oaiveávdnasis.

Čakčalohkanbaji álggus ordnejuvvo ođđa studeanttaid ja instituhta bargiid oktasaš dieđihan- ja oahpásmuvvandilálašvuohta. Oahppit ráhkadit vuosttas lohkanbaji loahpas persovnnalaš oahppoplánaid (HOPSiid). Daid gieđahallama várás sohppojuvvo juohke studentii sierra áigi, goas lea vejolaš ságastallat ovttas lektoriin ja amanuenssain dárkilabbot gažaldagain, mat laktásit oahpuide.

HOPS sisttisdoallá plána oahpuid ovdáneames, válljejuvvon oahppoollisvuođain ja áiggi geavaheames. Dat lea oahpuid várás ráhkaduvvon konkrehta plána ja dan gánniha dahkat dalán oahpuid álggus. Plána dárkkistuvvo oahpuid ovdánettiin ja rievdaduvvo dárbbu mielde. Oahppoplána guhkkit áiggi ulbmilin lea kandidáhta- ja magisttardutkkus, ja dát ulbmil juhkkojuvvo plánas unnit oasseulbmiliidda vai dutkosa čađaheapmi šaddá álkibun. Áiggi geavaheami plánen ja oasseulbmiliid olaheapmi leat maid veahkkin motivašuvdnii lohkat.

Sámegiela studeanttat čađahit oahpaheaddji pedagogalaš oahpuid (auskulterejit) sierranas oahpahushárjehallin. Studeanttat ráhkadit persovnnalaš oahppoplánaid (HOPSiid) ovttas šaddadandiehtaga lágádusa ja Giellagas-instituhta lektoriiguin.

HOPS -skovvi ja -rávvagat

Dieđagotti kansliija oahppobálvalusain oažžu almmolaš rávvagiid omd. dutkkusráhkadusas, oahppovuoigatvuođain, oaiveávdnasa molsumis, oahpuid buhttemis. Oahppobálvalusaid kansliijas čállojuvvojit buot dutkkusduođaštusat ja doppe oažžu rávvagiid válmmaštuvvamii. Pro gradu –dutkamušat guđđojuvvojit maid oahppobálvalusaid kansliijai, vai sii besset nammadit daidda dárkkisteaddjiid. Oahppobálvalusaid e –boasta lea opintoasiat.hutk(at)oulu.fi.