Oahpásmuhttin

Sámegiela oahpahus álggii Oulu universitehtas jagi 1970 suomagiela instituhtas. Álgojagiid sámegiela oahppoávdnasis lei dušše okta sámegiela lektor ja das muhtin jagiid geažes maiddái sámegiela ja sámi kultuvrra veahkkeprofessor. Jagiid mielde bargguid ja bargiid mearri lea lassánan nu, ahte dálá Giellagas-instituhtas leat juo čieža bargi: sámegiela professor, sámiid kultuvrra professor, guokte sámegiela lektora, okta sámiid kultuvrra lektor, dutki ja amanuensa. Jagi 2004 rájes Giellagas-instituhtta lea leamaš Oulu universitehta humanisttalaš dieđagotti sierra ovttadat, man báiki lea dál dieđagotti goalmmát gearddis.

Giellagas-instituhta ásaheami rájes, jagi 2001 álggus, instituhtas lea leamaš Suoma oahpahusministeriija mearridan riikkaviidosaš vástu ordnet ja ovddidit sámegiela ja sámiid kultuvrra alimus oahpahusa ja dutkamuša Suomas. Giellagas-instituhta vuođđudeami maŋŋá stuorámus rievdadus ovddeš ektui lea dat, ahte giđđat 2004 boares oahppoávnnas sámegiella ja sámi kultuvra juhkkojuvvui guoktin váldoávnnasin, namalassii sámegiellan ja sámiid kultuvran.

Eanet dieđut Giellagas-instituhta historjjá ja dálá dili birra sáhttá lohkat Veli-Pekka Lehtola čállosiin Oulu universitehta sámegiela oahpahusa guovddáš Suomas (PDF) ja Sámiid kultuvra oahppoávnnasin (PDF).

Giellagas aviisa (PDF)