Marko Jouste Sämikulttuur išeprofessorin
Ovdil Jouste lii porgâm ollâopâttâhlehtorin já Oulu ollâopâttuv Säämi kulttuurarkkâduv válduovdedeijen. Jouste tutkâmsyergih láá sämmilij kulttuur, historjá, taaiđâ já muusik. Sun nágáttâlâi Tampere ollâopâttuvvâst ive 2011. Suu náguskirje Tullâčalmaaš kirdâččij - Inarinsaamelainen 1900-luvun alun musiikkikulttuuri paikallisen perinteen ja ympäröivien kulttuurien vuorovaikutuksessa kieđâvuš anarâšâi historjálii muusikärbivyevi. Majemui iivij ääigi Jouste lii vuájudâttâm pargostis nuorttâlij ärbivuáhán já historján sehe koččâmâššáid, moh lohtâseh almolávt arkkâdâhamnâstuvâi kevttimân já maacâtmân. Oulu ollâopâttuv Giellagas-instituutist lii väldikodálâš ovdâsvástádâs sämikielâi já -kulttuur alemus tutkâmušâst já máttááttâsâst Suomâst.