Giellagas-instituhtta ohcá davvisámegiela universitehtalektora
Giellagas-instituhtas lea riikkaviidosaš ovddasvástádus sámegielaid ja sámi kultuvrra alimus oahpahusas ja dutkamušas Suomas.
Instituhta sámegielaid oahppoávnnas oahpaha giellaáššedovdiid sámi servodaga dárbbuide. Oahput addet vejolašvuođaid bargat ja ovdánit miehtá Sámi ja Davviriikkaid.
Sámegielaid oahppoávdnasis leat golbma linjjá: davvisámegiella, anárašgiella ja nuortalašgiella. Davvisámegiela linjá lea oaivvilduvvon eatnigielagiidda ja earáide, geat máhttet bures davvisámegiela. Instituhtas sáhttá maid čađahit davvisámegiela vierrogiela vuođđooahpuid 25 oahppočuoggá.
Barggut
Universitehtalektor
- oahpaha vuođđo-, ávnnas- ja čiekŋudeaddji oahpuid.
- bagadallá ja dárkkista oahppočájánasaid.
- fuolaha studeanttaid oahppoáššiid (nu gohčoduvvon omaopettaja-doaimma).
- dutká davvisámegiela.
- bargá hálddahuslaš bargguid.
Maid mii fállat?
- Doarjaga ovdánit ja juogadit iežat áššedovdamuša Giellagas-instituhta movttiidahtti bargobirrasis.
- Valáštallan-, kultur- ja buresveadjinovdduid (ePassi). Loga lasi bargiid eará ovdduid birra.
- Ovdánan- ja karrieravejolašvuođaid.
- Mearkkašahtti barggu stuorra organisašuvnnas, gos sáhtát heivehit oktii barggu ja eará eallima. Lasi dieđut Oulu universitehtas bargama birra.
Mii vuordit ahte dus lea
- doavtterdutkkus sámegielaid suorggis
- davvisámegielas C2-dási čálalaš ja njálmmálaš máhttu
- unnimustá vihtta oahppočuoggá universitehtapedagogalaš dahje vástideaddji oahput
- unnimustá guovtti jagi vásáhus universitehtadási oahpahusas ja bagadallamis
- máhttu oahpahit alla dásis, mii vuođđuduvvá dutkamuššii
- máhttu bagadit oahppočájánasaid
- máhttu ovddidit oahpahusa ja dutkanbarggu
- njuovžilis čálalaš ja njálmmálaš suomagiela máhttu
Dasa lassin mii atnit ovdun ahte:
- dus leat universitehtapedagogalaš dahje vástideaddji oahput 25 oahppočuoggá ovddas
- dus leat eará ánssut oahpahanbarggus
- sáhtát ja máhtát ovddidit dutkkusprográmma oahpahusa
- oassálasttát aktiivvalaččat dieđaservoša doaimmaide
Jos universitehtapedagogalaš oahput (25 oč) eai leat čađahuvvon, de vurdojuvvo ahte oahput čađahuvvojit guovtte jagi siste bargui álgimis.
Bálká
Bargu lea doaisttážii fámus 1.1.2027 rájes (dahje dan rájes go lea sohppojuvvon). Universitehta bálkávuogádagas bargu sajáiduvvá oahpahus- ja dutkanbargiid gáibádusdásiide 6–7. Dasa lassin máksojuvvo bálkáoassi, mii vuođđuduvvá persovnnalaš lihkostuvvamii, ja dat lea eanemustá 50 %. Vástideaddji bargguin bálká lea dábálaččat 4200–5400€ mánotbajis. Bargui gusto guđa mánu iskkadanáigi.
Mo ohcat?
Jos bargu geasuha, de oza Giellagassii rekrutterenvuogádaga bokte maŋimuštá 25.6.2026: https://oulunyliopisto.varbi.com/what:job/jobID:937188/.
Lavtte mielde dáid:
- Ohcamuš
- CV
- Narratiiva CV; geavat veahkkin málle (lassidieđut: Tutkimuksen ja tutkijan arvioinnin periaatteet Oulun yliopistossa)
- Publikašuvdnalistu
- Oahpahanportfoliija (eanemustá 5 siiddu), mii doallá sisttis čuovvovaš áššiid:
- Oahpahanfilosofiija, -strategiija ja -metodat
- Govvádus makkár don leat oahpaheaddjin
- Makkár lea du oahpahanvásáhus ja digitála oahpahusa máhttu, mo ovddidat oahpahusa, mo attát máhcahaga studeanttaide, sihke háliidatgo ovddidit iežat máhtolašvuođa iešguđetlágan oahppofálaldagaid bokte ja oassálastit riikkaidgaskasaš oahpahanovttasbargui.
- Leatgo ráhkadan ja geavahan oahppomateriálaid, maiddái rabas oahppomateriálaid
- Mo doalahat ja ovddidat iežat oahpahan- ja bagadallanmáhtu. Čilge iežat pedagogalaš oahpuid. Dutkamuša mearkkašupmi iežat oahpahan- ja bagadallanmáhtuid doalaheamis ja ovddideamis.
- Makkár máhcahaga leat ožžon oahpahusas (studeanta- ja fágaguoibmeárvvoštallamat, bálkkašumit ja dohkkehuvvon oahpahančájánasat) ja vuostemáhcahat
- Muital oanehaččat mo áiggut ovddidit iežat oahpahusvugiid lagaš boahtteáiggis.
Árvvoštallanproseassas geavahuvvojit olggobeal áššedovdit. Buoremus ohccit bovdejuvvojit jearahallamii, mii dollojuvvo njunnálagaid dahje gáiddusoktavuođa bokte. Oahpahanmáhttu árvvoštallojuvvo portfoliija ja oahpahančájánasa vuođul. Oahpahusčájáhusas galgá oažžut unnimustá “giittehahtti” (4/5).
Mii váldit oktavuođa buot ohcciiguin ohcanproseassa áigge.
Sávvat ohccin olbmuid: iešguđet ahkásaččaid, iešguđet sohkabeliid, ja iešguđege giella-, kultur- ja unnitlogujovkui gullevaš olbmuid.
Lassidieđut
Lassidieđuid addá jođiheaddji Sigga-Marja Magga, humanisttalaš dieđagoddi, Giellagas-instituhtta, sigga-marja.magga@oulu.fi, +358 50 568 5326.